إفتح
  

هل قدّم معتمد جمّال استقالته..؟؟


ونحن على وقع خبر عزم السيّد ربيع الزّكراوي، معتمد جمّال الحالي تقديم إستقالته وحزم أمتعته وأثاث بيته لمغادرة المعتمديّة تحت ضغط من يريدونه طرطورا بين أيديهم، نقول : بمعتمديّة جمّال، المعتمد يا يوافق وينافق ويقدّم صكوك الطّاعة والولاء ويعيش طحّان ويقعد في حجر سيدي وللاّ، يا تتمارس عليه جميع أنواع الظّغوطات والعراقيل ويقلولوا حنك الباب. يا تعيش راجل سيّدي المعتمد، يا خلّيهالهم يغرّد فيها البوم ويحلّ فيها رجليه الغراب. الجماعة ألي تحفرلك حاشتهم بمعتمد نسخة مطابقة للأصل للسيّد معتمد جمّال السّابق، هاك الكارثة ألّي عانينا منّو قبل.

الرّاجل في البلاد هاذي، مع الأسف ما يحبّوشي، يا تخرخطلهم السّروال وألّي تحتو، يا تولّي مسؤول غير كفئ وغير مرغوب فيك.

شدّ صحيح سيّدي المعتمد، يا تقوم بمهمّتك كرجل دولة بكلّ صلوحيّاتك كمسؤول بعيدا عن أيّ توظيف شخصي أو حزبي ضيّق باش تخدم مصالح جميع المواطنين بدون إستثناء، يا شدّ دارك وضميرك مرتاح وغادر مقرّ المعتمديّة وإنت راجل.

التّاريخ لن يرحم يا سيادة معتمد جمّال، يفوت كلّ شيئ وتغادر كرسي السّلطة، ويبقى إمّا تاريخ الرّجوليّة، ولاّ تاريخ تخرخيط جميع أنواع السّراول. كن رجلا وأنت في السّطة وغادرها رجلا مرفوع الرّأس.

أمّا أحنا، كمجتمع مدني محلّي بجمّال، فيبدو أنّ شتاءنا كالعادة سيكون ساخنا، لنجدّد العهد معا في إتّجاه الدّفاع على مصلحة الجهة، حتّى لا يستفرد بضربها أيّ طرف مهما كان من داخل السّلطة أو من خارجها خدمة لمصالحه الضيّقة. وقيّت باش نذكّروا بشعارنا المحلّي : جمامليّة أحرار وأحنا أسياد قرارنا ...

***مراد الميلي***

العودة للصفحة الرئيسية

مواضيع ذات صلة

التعاليق(0)

أترك تعليقك